3．Haqniq soqdoq nol gee ngal sal,
Piulsiil lavqgaol nol dovq ngal zaq. （HNDM：125 baq）
4．Haqniq soqdoq gee e pyuq meil taq bo,
Sii baqma eelqul baoq nei taq ziq. （HNDM：124 baq）
5．Haqniq soqdoq gee e pyuq meil bo e,
Doqsii qiq doq halmiav maq qaol nga. （HNDM：124 baq）
6．Haqniq soqdoq lilpuv eil e col yaol nal,
Ollol hhaolbao diq e wuqduq col pyu pyul lal.( HNDM：125 baq）
Aqtav pyu doq aqma 3-6 hev nei xil yuvq zaol hholqei e “soqdoq” aq, ngaldumavq gee e “doq”leil eil e nadul. Tyulliq, aqyoq ngaldumavq jollalhha nei gee e doq yul qa maq paoq hhoq bo. Haljivq alnei eil e ngeel nil? Aqyoq e ssaoqduq ssaoqquv maq paoq nga. “Soqdoq” leil meenia qa meil eil e nga. Qiq pyu baq nei eil lal alngaoq “sal”, “zaq”, “ maq qaol”, hhaqpyuq leil maq bo, “piulsiil laqgaol” hultav pyuq zeiq nga. Qiq pyu baq nei ngaoq, “Sii baqma eelqul” aqmeil, biq seiv pa seiv nei. Zalyil, aqnu qiq pyu baq nei eil lal alngaoq, “soqdoq” ssaoq bav ngaoq, “ollol”pievq lal maq ceil, ollol wuqduq zeipuv col yaol tuv lal aqmeil,“col yaol nal” lal nga leil eil ya. Xilmeil nei “soqdoq” ssaoqduq ssaoqquv aqnu qiq pyu ba jav nga leil tyuqmeiq loq al.
Aqhhuv pyu a qiq heiq salhu kal siq:
7．Haqniq soqdoq niq eil niq duv duv,
Joqdei milnil niq duq niq zeq zeq. （HNDM：125）
8．Haqniq soqdoq gee saq galcaol maq jav,
Joqdei milnil duq saq daoqdaoq maq jav. （HNDM：125）
Eiqsi aqtav pyu e doq aqma 1 nei 6 hev nei, gee e “soqdoq” doqlo xil lo meeq ssol dyul, gaq ssol saoq nga leil eil e ngaoq, 7 nei 8 hev nei xil niq zaol aq biqseiv nei miaq gaoq nga leil eil e ngeel al. “soqdoq” gee e maq gee saq qaol meil miaq, gee saq gee cil e galcaol maq jav meil biqseiv nei biq. Miaq e halmeil miaq, biq e halmeil biq nga leil xil meil eil ya, “joqdei milnil” aqmeil maq duq saq qaol, daoqdaoq maq duq mol qaol al.
Aqtav pyu e Haqniq doq aqma dyul Haqniq “soqdoq” aq, “doq aqma” ssolnei “sal e zaq e doqqul”xil niq qa yaol eil e ya. Xilmeil maq ceil, Haqniq soqdoq baqma aqkeil aqmeil daov biq, biq alnei gee saq e galcaol maq mol qaol. Daov navq , navq e daoqdaoq maq duq mol qaol.
Aqtav pyu e Haqni soqhhaq xil niq daoq maq ceil,“Haqniq Huvqpeiq Lapeiq Puv” （HNHPLP：1，114 baq） leil kul e lalbaq baqdoq yul daoq hholqei Pyulniuldoq liq“soqdoq” aq, pyulhiul soqmiav “doq” leil buvqzao taq ya.
Ngal niaol’aol zuv nei qiq heiq nyuq hu e, “soqdoq” xil lo e yifsiil aq, doq aqma ssolnei doqqul doqsal leil xil niq jivq e yifsiil maq ceil ya. Aqyo yifsiil aq, yomiaq miaq meil kevq ya. Xilmeil nei, aqhhuv pyu “soqdoq” e doqlo lociivq qiq taq hha geeza hu ya siq.
Niq. Haqniq “Soqdoq” e Doqlo Lociivq Geeza Hu
Aqdav pyu e Haqniq soqhhaq yul saol daoq eil e aqmeil ngeel alngaoq, “soqdoq” aq dama nei taol taq laq e doqmoq doq’yul, siilgol ngeel alngaoq, galhhu aqmil nei gee taq laq e doqma galcaol, niaoq’aol e doq maq ngeel al. Ngaldumavq “soqdoq” e “doqlo lociivq” xilmeil geeza hu kal.
Doqlo “soqdoq” hholqei “soq” ssolnei “doq” leil lociivq niq ciivq kevq nga. Lociivq “doq” leil xil ciivq aq, Haqniq doq, Pyulniul doq leil e “doq” nga. Ngaldumavq ciivzaol nei puq lal e, gee e doq ngeel al. Tyulliq, lociivq “soq” aq meeniav qa yaol eil e nga. Aqnu lociivq naogo liq daov paoq li nia nga siq.
“soq” 1，soqssaq soqma leil e soq， soqtal tal leil e soq;
“soq” 2, zeil soq leil e soq;
“soq” 3, hhaoldao soq leil e soq;
“soq” 4, wulquvq bi soq leil e soq；
“soq” 5, soqdo nei hhuv soq leil soq; bavq soq leil soq;
“soq” 6, soqhhaq leil e soq;
“soq” 7, soqmiav leil e soq;
“soq” 8, aoqsoq leil soq;
“soq” 9, soqpaq leil e soq;
“soq” 10, aqgee aqnia Haqniq doq hholqei saolssyuq taq leil saol;
“soq” 11, ceil soq leil e soq;
“soq” 12, soq meil soq alnei soq;
“soq” 13，soq albol leil e soq;
Aqtav pyu e lociivq “soq” yaol zuv nei hu lal e ngaoq, “soq” 1, 2, 3, 8, 9 ssolnei 12 aq, doq e yoteil tovq lal e naolngaoq, “soqdoq” hholqei e lociivq “soq” qiq mol maq ngeel laq kul ssa.
Aqtav pyu e “soq” 4 yaol hu lal alngaoq, ngalduq xilmeil nyuq hev qivq: “soqdoq” aq wulquvq maq kevq e doq, gee’qev nei, mallu nei e doq.
“soq” 5 yaol hu lal alngaoq, ngalduq xilmeil nyuq hev qivq: soqdoq aq soqdo nei aol soq taq laq e doq.
“soq” 6 ssolnei 7 yaol hu lal alngaoq, xilneil nyuq hev qivq: soqdoq a soqhhaq hultav buvq dav sso, soqmiav buvq duv sso e doq.
“soq”10 yaol hu lal alngaoq, ngalduq xilmeil nyuq hev qivq: soqdoq aq aqpyuq aqda nei“saol”taq laq e doq.
“soq” 11 yaol hu lal alngaoq, ngalduq xilmeil nyuq hev qivq: soqdoq aq ceil soq taq laq e doq.
Naolhao hao’li，“soq” 13 yaol hu lal alngaoq, ngalduq xilmeil nyuq hev qivq: soqdoq aq soq albol aqmeil hhaol e doq.
Aqtav pyu geeza e xildyul yaol zaoma nei ei lal e ngao, Haqniq “soqdoq” aq aqnieivq maq kevq meil, alhovq maq hovq meil, aol soq taq laq e doq aqmal mallu nei, galhhu aqbei nei saol taq laq e doq ngeel wulyaq.
Saol. Haqniq “Soqdoq” Hholqei Haljivq Kevq Nga Laq
Aqtav pyu gee e HND YYD DL SD hholqei, Haqniq “soqdoq” aq “doqmoq doq’yul, siilgol” leil buvq taq. Qiq baol hholqei, ngaldu Haqniq “soqdoq” aq “baqma aqkeil” laoqmeil biq, “joqdei milnil” laoqmeil navq leil gee taq. Niq baol qiq bao hholqei, ngalduq Haqniq “soqdoq” aq, “soqdo nei ceil soq taq laq e daq aqmal” nga leil gee taq. Haqniq soqdoq hholqei haljivq halqa kevq hhoqbo nga laq?
Zaoma nei hu lal e, Haqniq soqdoq aq, hhuv soq taq laq e doq ngeel wul naq. Ngaldu Haqniq ssaq yeilhha salhha nei gee e, “Sal …Yil …laolngaoq, lalbaq”. “Yil…Wuq…laolngaoq, aqzil”. Ngaldu Haqniq doq xil doq yaol zuv nei nyuq hu e ngaoq, neema hholqei kevq nei loq lal al. Haqniq soqdoq qiq pul qiq pul a, qiq quv qiq quv a maq paoq. Yobei qiq doq nei galquv taol taq, teilsal seqtevq tevq taq wul naq.
Xilmeil ngeel alnei, ngal nyuq e ngaldu Haqniq aqpyuq aqda nei gee taq laq e Haqniq soqdoq aq, taolso aqyal meil kevq wul yaq. Haqniq doq aqma maq ngeel, doqdaq maq ngeel, aqnil dalya maq ngeel, Haqniq ssaqguq ssaqnaol caldoq maq ngeel, aqzil maq ngeel, ceil qivq yal jivq e Haqniq lalbaq maq ngeel xil mavq saq nei liq soqdoq hholqei qiq qa qiq qa meil ceil soq taq laq e ngeel wul naq.
Xilmeil ngeel taoq ngaoq, Haqniq soqdoq leil Pyulniul e doq nei gee lal e ngaoq, Haqniq Ssaq Miqjeil Weiqxoq leil gee sso wul yaq.
Yodaoq Leev
Zaoma nei eil lal e ngao, ngaldu Haqniq soqdoq huvqlavq mol gaoq. Haqniq soqdoq doq’yul yomiaq miaq meil jav. Tyulliq ngaldu Haqniq soqmiav aq 50 huvq naolngaoq maq biao siq alnei, Haqniq dama nei saol taq laq e soqdoq biq seiv nei jav e liq, maq buvq teiq siq. Xilmeil nei soqdoq miqnieiq alyeil xao galma mol nga siq.
Ngalduq xilmeil lei geeza e caq lal maq caq lal. Xil naolhao, ngalduq Haqniq soqdoq leil doqlo xil lo Pyulniul doq buvq zaol e tyul taq, aqtav pyu hal gee taq laq e yuldyul maq ceil meil，Haqniq miqjeil weiqxoq leil gee e caq lal nadul?
Haqniq soqmiav nei, soqdoq qiq qa qiq qa meil, caqcaol zilhevq nei hha buvq soq jil wul naq. Xilmeil aol xia heil nia alngaoq, soqdoq doqmoq maq ceil, soqdoq doqsiivq, maqna aq, Haqniq weiqxoq yosiivq aolssaq liq aqzeiq meil duv lal nia zeiq al. Yulmeil ngaoq, Haqniq doq ssolnei yeillul liq qiq savq jav nia, qiq heiq meil maq bial yil nia al.
2006 huvq 11 la siq Dolnia Haqniq Soqhhaq Buvqzol Zolba a geemeiq e soqkao
|
網站名稱 昆明葳盛茶業(yè)有限責任公司
聯系電話:0871-63559399 手機：13658833704 QQ:348058891 564855862